اربعتاشر سنة

حافر اسمه ع التختة
سنه اربعتاشر سنة

قاعد علي نفس التختة
اللي قاعد عليها انا

لابس نفس المريلة
وفقلب الشنطة منقلة
تقيس درجات حبنا
بالسنتي و بالحتة

من طابور الصباح
لحد ساعة المرواح
نضحك سوي
نهزر سوي
نتخانق سوي
نتعاتب سوي
ونروح سوي
ع البسكلته

بحبه اوي
هيوحشني اوي
يلا ندعيله
كتير اوي

وان شاء الله
هيعيش ف مكان نضيف
ويتنفس هوي نضيف
عند ربنا
الله

هيغفر كل ذنوبه
وهينسج من توبه
صبر
يقَوت اهله
علي بُعُده
و ع الفقر
اللي شنقه
وحرم الحتة
من ضي
عمره...اربعتاشر سنة
((شوف هنعوضه بعد كام اربعتاشر سنة!؟))


مصطفي التلواني

يا ريت يا جماعة....نفكر في الكلام اوي وفي الولد واهله
وانا مبعتبرش دي قصيده
دي مجرد كلام طالع من القلب

خفاش

خفاش
عاشق للضلمة
لو صبحت نور
ميعشهاش

عصفور
شاطط م العتمة
لو فضلت كاتمة
ميطقهاش

خفاش
دايما مسعور
غارس نابه ف اهل البيت
راشق سمه ف عين النور
سارق لحمة وسمنة وزيت

حابس الشمس ف كهف الخوف
ولافيش عصفور
حَلَق او طار
وفك الحبسة
وعلن الشوف
وعزف الصبح ع الاوتار

خفاش
عاشق للضلمة
لو صبحت نور
ميعشهاش
عصفور
شاطط م العتمة
لو فضلت كاتمة
ميطقهاش
**

كلماتي
مصطفي التلواني
لسان عايز قطعه

مش بايدي..متدمعيش

لو كان بايدي
كنت قطفت الباقي م العمر
وزرعته..طُهُر.. ف محراب عنيكي
كنت قلعت جذور الصبر
وغرست ف روحي شوق
مخلوق اليكي
لكن...مش بايدي
**
مش بايدي.. متدمعيش
وافتحي ف قلبك زقاق
يرميني علي باب الفراق
ابعد عن عَتبِِك واتوه
عن رمل شطك المشتاق

لمطر خريفي
وجرحي ونزيفي
علي ارضك
وصدقي وزيفي

وعيونك بتغسلني م الهموم
بتخِلي قلبي م السموم
بتفتحلي طاقة نور
كما يوم ولادتي..من غير هدوم
مش بايدي ..متدمعيش

قطعي ايامي قصاقيص
كبي دوايه الحبر
واملي مكانها بصبر
يصبر ..علي حطتي ف الكراريس

حكاية حلوة للعيال
يفهموا معني الجمال
والفراق والاشتياق
وعشق ناقص للوصال

وينسوا لحظة الكبر
ان الملاك عشق بشر
قصة ومصيرها الخلاص
كما الدفا وقت السحر

ولو ف مرة الصبر خانك
والزكري جت دقت ببانك
اخرجي للارض خضرا
احصدي منها عدانك

تلقي صورتي فيها حاضرة
وقتها بس...

ازرعيني بين ضلوعك
ارويني دمعه من دموعك
اتغطي بيها ف المخاطرة

اتوضي بيها يوم صلاتي
ف محراب عنيكي

واطلق اسراب آهاتي
واقول
لو كان بايدي
كنت قطفت الباقي م العمر
وزرعته..طُهر.. ف محراب عنيكي
كنت قلعت جذور الصبر
وغرست ف روحي شوق
مخلوق اليكي
لكن.. مش بايدي..متدمعيش

كلماتي
مصطفي التلواني

ساعة الفجرية

ساعة الفجرية...تتوضي سمايا
تقطر ندي...علي جبين ورداية
تملاها صفا ...وحب ودفا
**
وكروان طاير...بيغني بحرية
وقطرات ندي...ترويه بحنية
ترسم طريقه...من غير فلسفة
**
كلماتي
مصطفي التلواني

تايه

تايه ف بلدي بين اهلي
وسط زحمة الميدان
داير ف الشوارع والزقاق
اطرق الببان
اسأل العيون
منين القي طريقي؟
يا اهل بلدي الطيبين

تايه

وبلاقي الجواب
مرسوم ع الجبين
ف ضحكة طيبه
تداري الهموم
ويقولولي
بنبرة صوت مكسورة
كلنا زيك......تايهين

تايه
كلماتي
مصطفي التلواني
لسان عايز قطعه

ورطه كبيرة

اباجورة وفازة
صورة وقزازة
قاعد علي كرسي وشارد
بيلعن دي ام جوازة
واقع ف ورطة كبيرة
وبيترجي قزازة البيرة
تفضل كما هي متخلصشي
ومتطلعش.. من عيلة كبيرة
زي مراته اللي اتجوزها
وفاكر لما يكون جوزها
يقدر يحكمها ويشكمها
ويديها كمان علي بوذها
لكن الوضع خلف خلاف
ماشيين مع بعض خلف خلاف
هو يمين هي شمال
وكلمتها ماشية..وان شاف
الصح ف كلامه
تعرفه تمامه
وتخليه مش عارف
وراه من قدامه
وتخرج غضبانة
عاملة زعلانة
تجري علي بابا
وتقول آه يانا
دايما معاندني
دايما مغالطني
وانا ساكته عليه
رغم انه خانقني
والست الوالده
قوية وجامده
كلمتها قانون
متعرفش مناهدة
تؤمر يصالحها
وينفذ اوامرها
من غير نقاش
كاملة بحزافرها
وهي تحَجر
تشرط تتأمر
وتقوله يا سبعي
سبني أفكر
ارجع مرجعشي
اسكت متقولش
ده قراري انا
ومتدخلشي
_ده كلامها هي_
وهو يا ويله
يا سواد ليله
يا جوازته القرعة
وبكاه ف مناديله
واقع ف ورطة كبيرة
وبيترجي قزازة البيرة
تفضل كما هي متخلصشي
ومتطلعش من عيلة كبيرة
...
كلماتي
مصطفي التلواني
لسان عايز قطعة
25\7\2010

طعنها وانتحر

دخل المطبخ ليعد فنجان من القهوة..وضع الكثير من قطع السكر..اخذ يقلب ويقلب..وضعها في كوبه المفضل
جلس الي جوارها يتقلب بين ذكرياته..يذوب في ايامهم الماضيه
تذكر اول صدفه جمعت بينهم..خجلها حين لمس اناملها لاول مرة..
سافر وانتقل علي جسر طويل من الذكريات الي ان وصل اليه صوتها
القهوة خلصت خلاص انت بتشرب في ايه!؟
نظر اليها وابتسم ..دون كلام..ثم قال..
عايزك في الوضة ثواني..ادخلي وانا هحصلك..
اخذته دوامة من الاحداث القريبة والذ كريات الاليمة التي نزلت عليه كالصاعقة حين طلبت منه الرحيل..
دخل الي المطبخ مرة اخري..
فتح جميع الادراج حتي عثر علي ما يريد..اخذها. ودلف الي غرفة النوم
تلك التي شهدت احلي ما تذكره في شروده
فتح الباب ودخل..تركه نصف مقفل..
وجدها جالسة علي الفراش..في سكون..شعرها يتدلي علي ظهرها..كليلة ليلاء..
اقترب منها واقترب..ارح كفه علي كتفها ..شعرت بشىء غريب في لمسته..ارتعشت..
نظرت الي يده اليسري..وقبل ان تسال عما يخفيه..
قال...انا موافق نسيب بعض.......

نزلت دمعه من عينها..حاولت ان تبعد يده عنها..دون جدوي
فقبض علي كتفها..ازعجها..اخافها..
غرس انامله في كتفها..احكم قبضته...
اذاقها..ما لم تراه منه من قبل..شعرت بسيل من القسوة ينهمر من انامله..
حاولت ان تصرخ ..وقبل ان تصرخ..
انهال عليها بالطعنات..اخذ يطعنها ويطعنها..دون انقطاع
حتي تأكد من فراقها للحياه..ليس له..
التقف المقص من فوق الكوميدينو..قص خصله من شعرها ..ليست بالقصيرة..لكنها كافية..
اخذ يتذوقها..ويتنفس عطرها..
ثم..اخرج ما في صدره من آهات وصرخات...
صرخ وصرخ وصرخ ...ثم انتحر..
(لا جدوي من الحياه بدونها)

تحياتي
مصطفي التلواني

ماسك ورقة ف ايده
و ف ايده التانية قلم
نني عنيه ثابت
ع الورقة
بيفكر ف اللي فات
ضميره بيعذبه
بيأنبه
والندم
بيزيده الم
لكنه صابر
بيعافر
ويعاند من سكات
بيطوف ف الزكريات
ويتحرك ف ثبات
بين قسوته
وحنيته
بين ضعفه
وقوته
وبين الزكريات
بيقابل زكريات
يلمحها وتلمحه
فتجرحه
وتفرحه
لما يلاقي روحه
اتوضت بالدموع
والورقة
بين اديه
ف وضع الخشوع
بتتحايل عليه
يملاها زكريات
...
كلماتي
مصطفي التلواني
لسان عايز قطعه
...
التلات
20\7\2010

انا مش طاهر من الاخطاء
ولا قادر اكون توب ابيض
ينور ف عز الشمس
بيختلف
ف ليل الامس
عن روحي
الغرقانه ف الاخطاء
الندمانة علي اخطاء
ارتكبتها
من غير تفكير
...
روحي
الندمانة علي اخطاء
شافتها
عيون الخالق
مشافتهاش الخلايق
النعسانة
وغفلانة
من غير نوم
وطول اليوم
وكل يوم
تغلط
وبعد الغلط
لحظة تفكير
او تبرير
وتعدي الغلطة وتطويها
ف درج العمر اللي بيعدي
اللي واخد وبيودي
علي ماضي
كان
وبيكون
وممكن يكون
مع تكرار الاخطاء
...
اصلهم بشر
وانا بشر
مش طاهر من الاخطاء
ولا قدر اكون توب ابيض
ينور ف عز الشمس
بيختلف ف ليل الامس
عن روحي
العاشقة للاخطاء
...
كلماتي
مصطفي التلواني
لسان عايز قطعه
19\7\2010
الصورة
تصوير الفنان\ احمد فتحي

بنت وولد

(1)
بنت وولد
حكاية بلد
عشق ونبت
بالحب اتحصد
(2)
بنت وولد
عشق اتخلق
بين اشعار الورق
وحمامة طايرة
بين جناحاتها رسايل
ف طياتها غرام سايل
ملوش عدد
(3)
ولد .. ولد
علي شوقه اتسند
واتحدي الكون....
واعتمد...
علي قلبه العاقل المجنون
حطم كل الظنون
وابتدي الحكاية
شق الطريق
بعزم جرىء
لا بينحني
ولا له نهاية
ولد..ولد
(4)
بنت وولد
مش قيس وليلي
ولا عنتر وعبلة
ضي وضي
مفيش زي
حنين قايد
وحنين حي
لقي العيون
علي صوت الناي
(5)
بنت....
الجدايل...مضفورة ..محبوكة
الانامل مشبوكة
ف الكف
والشمس ويا القمر
بتتزف
الحبيبين شاهدين
وراسمين لهم كهف
من قلبين
ع الشط
الولد ويا البنت
(6)
بنت وولد
الحب لما يعيش
الزمن ..يقف ميمشيش
يشاهد..يهيم..يعيش
ف الحب اللي مينتهيش
(7)
بنت وولد
حكاية البلد
ييجي الزمن
ويروح الزمن
الفرح...الشجن
الريح..تلو الريح
النقش ع الحجر
مفاجأت القدر
متقدرش
علي حكاية البلد
البنت ويا الولد
...............
كلماتي
مصطفي التلواني

انا الشعب والشعب انا

انا الشعب والشعب انا

انا مصر ومصر انا

انا المصري العنيد المصر

وانا المصير القاسي الصعب

انا التزوير ف الانتخابات

انا اللي زور واللي حور

واللي عاند واللي حجر

و رفض يبيع ضميره

عشان شوية قرشنات

انا الصرخة والاهات

انا الضحكة والكدبة

علي وش البهلونات

انا الشعب والشعب انا

انا مصر ومصر انا

انا الصوت والسكات

انا الفزع والجزع

قدام البهوات

والبكوات والبشوات

انا الشعب والشعب انا

انا مصر ومصر انا

انا النسمة علي شط النيل

وسحابة صافيه علي موجة بتميل

لمسه دافية من شاب نحيل

بتوعد بنت بوش بشوش..حلو..جميل

بتنطق..متخافيش..هعمل المستحيل

هحقق امانيكي..وهتعيشي ف هنا

انا الشعب والشعب انا

انا مصر ومصر انا

انا الحركة ف الشوارع

وصوت الادان ف الجوامع

ودق العمل ف المصانع

رنة اجراس الكنايس

وتعليم بايظ ف المدارس

انا الزحمة ف اشارات المرور

وعشره جنيه متكرمشة

من سواق غلبان معزور

انا الشعب والشعب انا

انا مصر ومصر انا

اعتصام واحتجاج وعذاب

علي رصيف مجلس ....

بيقول ببجاحة وتناحة

انا الشعب

انا اللحية والجلبية

والنية المستخبية

والفتوة الفضائية

والغنوة المتشخلعة

وجمهور..لبس البردعة

انا الشعب والشعب انا

انا مصر ومصر انا

انا اللي عليت وبنيت

وغزيت واتغزيت

ف كتب التاريخ

انا الحاضر

اللي من غير ما يكبر

بيشيخ

انا الحرية ف الكلام

والكلام الحر

انا الحال اللي مش تمام

والوضع المر

انا اللي هزيت التاريخ

واللي هتهزأ ف التاريخ

لو سكت علي زمن المسخ

انا الشعب والشعب انا

انا مصر ومصر انا

كلماتي

مصطفي التلواني

لسان عايز قطعه

رحلة عاشق

تمني وانا اجيب لاصبح من قلبك قريب
تسائلي وتعجبي.. فيكون عندي الجواب
عن سبب اشتياقي وما في قلبي من لهيب
عن حبي لاشجار خضر ولطائر العندليب

عن رحلاتي في الصحراء وتحمل كل الشقاء

تريثي وامهليني اتجول في صفحاتي البيضاء
تلك التي اتمني ان تنول منك رضاء
دعيني انقل حبي بكل ما يحمل من صفاء

نعم..فانا احبك..بل اعيش حياتي لاجلك
عسي ان تتكرمي وترمقيني بنظرة من عينيك

ارحل واسافر الي الصحراء لالملم حبات حبك
الملمها من الرمال لاشيد بداخلي وطنك

تكوني مليكة بداخلي وحبك باقيا في ناظري
ملكا اعيش في رعايته ويتناثر بين جوارحي
لينير قمرك ليلي وتضىء شمسك قمري
لابحث في الليل هائما عن عاشق لك مثلي

فلا يوجد من يسعد باحلام ويعيش لكي اخلاصا
فارفع التحدي لوائا واطلب من وجهك اشراقا
واعيش في حياتي لحظات لاكون عازفا ماهرا
استوحي ذرات صوتك..لاصبح ايرا شاعرا

استرسل في الاشعار واعبر بها الانهار
لتصل الي كل الدنيا..انشدها ليل نهار
يسمعها كل من حولي من قوم..اشرار واخيار
ويقومو بنقلها اليكي بكل ما تحمل من اسرار

تلقين بنظرك علي اوراقها..يرق قلبك بسماعها
فتريني بين الاشعار.. اشذب معانيها . كلماتها
وتظهر اجابتي ... واضحة معانيها
لتعلمي اني احبك..تتعلمي كيف تتزوقيها


حبيبتي..قلت اسألي وتمهلي ليأتيكي جوابي
لتعرفي سبب حبي..اشتياقي..حنيني..عذابي

والان قد علمتي قصتي
تيقنتي انك اعز احبابي
فهل لكي بأسئلة
قبل ان يغلق الباب
واصحو من احلامي الجميلة
يا محبوبتي الغالية
ويلوح في الافق بعادك عن خيالي يا اجمل جميلة؟؟؟؟؟؟؟؟؟؟

مرتضي وجها لوجه شوبير

جلسة صلح لم تكتمل بين المستشار مرتضي منصور والكابتن الاعلامي السياسي عضو مجلس الشعب رجل الاعمال..احمد شوبير
تحت عبائة الداعية الاسلامي خالد الجندي وادارة الاعلامي محمود سعد

ودون تفكير لم يكتمل الصلح ولم تكتمل الجلسة بعد طريقة كابتن شوفير المستفزة في التعليق علي كلام المستشار مرتضي
وبعد جرأة اتهامات مرتضي لشوبير وعدم استطاعته الرد علي اي من سهامه او حتي الرد بطريقة سياسية محنكة تعودنا عليها من شوفير...تعبر عن كبريائه الشديد وتكبره ونكرانه لاي شئ يتعرض له
والخكم لك عزيزي المشاهد

التعلب المكار

التعلب المكار..ماله قاعد محتار!؟؟

ايه شاغل فكره..مخلي ليله نهار!؟؟

مش عادته يفضل ساكت

من غير ما يشاكس..من غير ما يعاكس

من غير ما يخانق..من غير ما يخاوت

ده عوايده

يجور علي حق ده

يمص في دم ده

والتار فباله بايت

وعدوه عنه ساكت

....

لكن التعلب

فسبيل التار

يشعلل نار

يموت جار

والكل...فعينه حمار

....

ياما قوم حروب

من غير ما يروح

من غير ما يئوب

ده التعلب المكار

فاكرينه قاعد ساكت!

الدنيا بسببه غليت

وقلبه بالشر حافل

وعدوه عنه غافل

....

ده التعلب المكار ..من يوم الاحزاب

ناوي يحط الكل ..تحت الدرس..تحت الناب

مع ذلك

بيشاغل فده

ويحايل فده

يركب الكبير

يرعب الصغير

ده التعلب المكار

فاكرينه قاعد ساكت!

ده تاره فباله بايت

عمره ما يغفل عنه

وده سم هيشرب منه

....

بس يئون الاوان

ويبان قلبه الجبان

وحقيقته انه ضعيف

يكره الحق العفيف

ياما زور و زور

في تاريخه غير وغير

في الدنيا شاف الشتات

وحاله دايما فتات

ضاع من قلبه الامان

ضاع فكل مكان

نهايته هو عارفها

والله فعينه شايفها

ده التعلب المكار...فاكرينه قاعد ساكت!!

قاعد ينبش فقبره

وبكره هيلعن فقدره

اصله كده

الايمان من قالبه راح

وشطانه فودنه باح

... .... ....

وده التعلب المكار

عرفته ليه قاعد محتار؟؟

تحياتي

لسان عايز قطعه

هنا القاهرة..هنا العاصمة

تكبير مآذن

أجراس كنايس

صوتها يدوي فالزحمة العارمة

هنا القاهرة..هنا العاصمة

ناس رايحة جاية

شعب دماغه عالية

سايبها علي الله

ولا حاطط فالنية

هنا القاهرة..هنا العاصمة

عرق وجهد لكسب القوت

حكايات لفتوة بالنبوت

لعم نجيب..انجب اديب

واسع الشهرة..ذايع الصيت

هنا القاهرة هنا العاصمة

جهل النفوس

اهو انت كده يا انسان
ما اغربك
ساعات تكون بهلوان
الصعب يحلالك
ساعات تكون ضعفان
القشة تقسمك
ويحصل مهما يحصل
ولا حاجة تغيرك

عشان تخلق سلام
تشعلل حروب
تحتل تستعمر
تروح وتؤب
تمشيها بالعكس
وتبعد عن السلام

ولو طالب امان
تشق..تلف الدروب
والامان
عند رب الامان
مش ناقص ولا فيه عيوب
لكنك متحسوش
لانك ناقص الايمان

يا انسان ما اعجبك
عشان حفنة ورق
تبيع اخوك

يا انسان ما اعجبك
عايش دايما فقلق
كاوي نفسك
بنار التعاسة
والبلادة
من صفاتك
..طبعك الكلام

فاكر نفسك ناصح
ودايما شطانك كسبان
فاكر انك مرتوي
لكنك دايما عطشان

ما اجهلك
ما اعجبك
ما اغربك يا انسان

قولك عقلاني
فعلك غير انساني
عايش لنفسك

عايش حياتك اناني
تدمر تغير
مع انك جاي تعمر
ماشي عكس التيار
وطول عمرك وحداني
..................
كلامي فيك مش هيأثر
ولا فحالك هيغير
لكني نصحتك بالطيب
مش اكتر
عشان هتندم يوم
وتتمني تتعلم من غلطاتك
فيوم
مينفعش فيه الندم
ولا فيه وقت لعلام
....................
الكلام لكل انسان ...بما فيهم انا

تحياتي...لسان عايز قطعه

من أجل مين؟؟؟

من أجل مين؟ هموم باركة علي قلبنا.. ومش رحمانا

من أجل مين؟حزب خلاص شلنا.. سياساته مش عتقانا

من اجل مين؟ يتشفط دمنا ..ومنقدرش نقول اه يانا

من أجل مين؟ فلوسنا فبنوك سويسرا..جيوبنا فقرانة

من أجل مين؟ لطبقتين اتقسمنا..واحدة هايلايف..التانية عدمانة

من أجل مين؟ صوتنا جوانا اتكفن..اللي اتكلم بعتوه السلخانة

من أجل مين؟فساد عيني عينك..مش قادرين نفتح

من أجل مين؟ صحة بيني وبينك..محتاجة تتشرح

من أجل مين؟ تعليم خد عندك..راح الكباريه يتفسح

من أجل مين؟ امان..هات ودنك..بلاش فالكلام نفتح

من أجل مين؟ الانسب اللي يذلك..واللي يعكس..ليه نشرشح

من أجل مين؟ احط همي علي همك..في الدري نشتم ونقبح

من أجل مين؟هدمتي منظرها قيح..مهيتي شوية جنيهات

من أجل مين؟ الشريف..فيه ندبح..الحرامي بقي له كرامات

من أجل مين؟شباب عايش متهمش..عايش ياكل كرات

من أجل مين؟ ادارة.. قاعدين نلوش..لما بقت زبادي خلاط

من أجل مين؟ الادب..منعرفش انه..كان وفات ومات

لسان عايز قطعه

متحيروش نفسكو من أجلي أنا

زنزانة اتزلزلت جدرانها بزلزال

زنزانه اتزلزلت جدرانها بزلزال

كانو فاكرنها

اتخرس لسانها

ودوام الحال م المحال

صوتها صرخ صرخة عمال

فلاحين..اهل بلد..بنت وولد

كله انتفض..شيوخ وعيال

ثارو

قامو

يهدو جدار الذل

لتشرق فسماهم شمس الامل

لينهو اسطورة

كانت كدبة كبيرة

حكاية غلابة

وطبقة فقيرة

عوايدها

الفوضي..الغبا..البلاهة

ومن ساعتها

من ساعة الانتفاضة

الزنزانة اتزلزلت جدرانها بزلزال

يبني ميهدمش

يقدم ميأخرش

باهلها وولادها

عمل

يحرر ميكبلش

تحياتي

مصطفي التلواني

برطمة شعب 1

مواطن
كل مشكلتي اني مصري
متهان
المهانة واخد حقها حصري
كرامتي
متنطورة فالطوابير متبعترة
شقيان
والتعب هد حيلي وامري

مواطن
مين يحس بيا وبمشاكلي!؟
تعبان
م الوعود اللي بشكل شكلي
امنيتي
نبطل كفاية ردود رقمية
عشمان
في رد واحد مش بشكل شكلي

مواطن
نفسي فبلدي اخد حقي
قرفان
من كارت واسطة خالي وعمي
مشكلتي
فسري بلعن وبحسبن
شبطان
فحد يقدر يجبلي حقي

مصطفي التلواني

بنحبك موت يا اكسي

السبت 6\3\2010 ثالت اسابيع الدراسة .الفصل الدراسي الثاني
لكنه اول يوم دراسة بالنسبة لي
ذهبت الي كليتي الكريمة العفيفة حاملا جرنان الدستور وكشكول فارغ تماما
محملا ببعض الامال في رغبة في حضور اي محاضرة لاي دكتور -ربنا يفتح علينا ونعرف حتي اسامي المواد-
لكنها عادة كل سنة(ربنا ما يقطعها عادة) عندما القي بنظري علي المدرج وامعن في رؤيتي .اجد حجم الطلبة المهول الذي يملا جنباته
وكلما اقترب واتحسس رائحته الرائعة0(بعيد عنكو)ده غير الاكل والشرب اللي مرمي علي الارض والدوشه اللي تطرش
مع بعض الجمل النسائية الشريرة..لا داعي لذكرها الان..
مع كل هذه الموانع والظروف السابقة افضل السلامة واحبذ قراءة الجرنان وابقي وحيدا

....عندما فتحت جرناني وتصفحته .سقطت عيني علي اخبار لا تسر وهي كثيرة من نوعها ..وخطيرة ايضا..
اخبار عن ما يحدث في المسجد الاقصي
من محاولات هدم واقتحام الشرطة الاسرائيلية مع تطاولها وهجموها علي المواطنين الابرياء العزل المرابطين داخل المسجد خوفا من اقتحام الجماغات اليهودية المتطرفة للمسجد
مع صمت رهيب ومخيب في العالم العربي والاسلامي علي المستوي الرسمي اكيد..وسرعان ما انتقل الي المستوي الشعبي
وعدم التحرك باي رد فعل ولو مقاطعة اقتصادية لارغام الكيان الصهعيوني ليرجع عن محاولاته الارهابية هذه
...في ظل قرائتي للاخبار السابقة المفزعة جال في خاطري مشهد كم تمنيته..كمجرد بداية لانتفاضة شعبية واعتراض علي ما يحدث...تخيلت مظاهرة سلمية بسيطة لكنها كبيرة
..ولو مجرد مظاهرة كبداية..
تضم ملايين الشباب من شباب جامعاتنا المصريه

ويا رتني ما اتخيلت
لانني صدمت عندما رأيت................

• عندم رايت شابا يقف علي قدم ونصف ويستند بكوعه علي كتف احدي الفتيات..ده غير البوكسر اللي منور بلونه الاحمر
• عندما رأيت فتاه تقف متباهية بنوع- الروجاجو-لمو اغزة الذي تضعه.. بين اصحابها. واخري تقوم بوضع المسخرة-المسكرة بعد التعديل- مع نظرة ثاقبة في مراتها....ده كله قدام الخلق..يلا
• عندما رايت شابا وفتاه يكادا ان يلتصقا ببعضهما البعض ..والمدعو -الحبيب- يمسك بيدها اليمني وهي باليسري تسرح له حواجبه...هههههههه خد من ده كتير
• عندما سمعت فتاه اخري منظرها في غاية الاحترام.وهي تقسم لصديقاتها انها ستوقع بذلك الشاب الوسيم في غرامها.في اقل من اسبوع...عشان تحطم رقم سونيا شخلع
• عندما سمعت في هذه المرة شابا يتلفظ باقبح الالفاظ والتلميحات امام مجموعة من الفتيات وهن يتغامزن بعضهن البعض...واصواتهن تجلجل ضحكا...يا حلاوة
• في بقي صدمتين ..كوم واللي فات كوم تاني
• الاولي...عندما رأيت نفسي في احد الاركان اجلس وحيدا شريد الذهن هههه ابكي بسبب حبيبتي التي تركتني..هاع هاع هأ هأ..
• الثانية والاخيرة...صديقي الذي اتي من خلفي وصفعني علي قفايا وسخريته مني لانه وجدني امسك ورقة وقلم واكتب ذلك المقال

مع كل المشاهد والصدمات السابقة ..ده جزء هين بس..تمنيت الا احلم حلما كهذا مرة اخري حتي لا اسمع احدا في المظاهرة

يردد قائلا.....بنحبك موت يا اكسا....يا دي الفضيحة

لسان عايز قطعه

مذكرات واحد معرفوش...للكلام بقية

مسرحية كوميدية...المحاكمة الشعبية

في الايام القليلة الماضية من بعد اعلان الدكتور محمد البرادعي تكوين الجبهة الوطنيه للتغيير مع عدد من الشخصيات العامة التي التفت حوله مثل.الاعلامي الشهير حمدي قنديل والدكتور حسن نافعه والدكتور محمد ابو الغار والاستاذ عصام سلطان بالاضفة الي الروائي العالمي علاء الاسواني وكثيرا من الشخصيات الحزبية والمستقلة..
ظهرت الصورة واتضحت قليلا بالنسبة لكثير من طبقات الشعب واحزاب معارضة وحزب وطني وفئات الشباب المؤيدين والمعارضين
حيث اتضح ان الدكتور محمد البرادعي لن يخوض الانتخابات الا اذا حدث التغيير في بعض مواد الدستور كما يرغب..التي تقيض حرية الترشح في الانتخابات ..حسب كلامه
وان هدفه الاول والرئيسي هو التغيير السلمي المنبعث من قوي الشعب وليس خوض الانتخابات هو هدفه الاول
ومع كل ذلك ظهرت بض الاقلام المارضة للدكنور البرادعي والمارضة لطلباته
بخلاف تلك الاقلام التي قامت بسبه وقذفه ببعض الشائعات التي زادته قوة
مع وجود بعض كوادر الحزب الوطني التي اكدت احترامها الكامل له ولاعماله لكن اكدت ايضا لي صوبة تغيير مواد الدستور حسبما يريد
بدعوة انها مناسبة وديمقراطية
واذا كان يريد الترشيح فليتفضل ويترشح طبقا للمواد الحالية

لكن الغريب والمضحك هذه الايام وفي ذلك الحراك السياسي ..ظهور مجمعوة من الاحزاب تطلق علي انفسها لقب احزاب معارضة-تحت السلم-
وهي احزاب لا يعلمها رجال السياسة حتي يلمها المواطن المصري البسيط ولا داعي لذكر اسمائها
وقد كونت جبهة مضادة لافكار ومطالب الدكتور البرادعي وممن مه وذلك برؤية ان الدكتور قد جاء بأجندة غربية وانه عميل لاحدي الدول الاجنبية
وقد قامت تلك الاصوات باطلاق ما يسمي بالحملة الشعبية لمحاكمة البرادعي
بعد ذكر ما فعلته تلك الهياكل الكرتونية التي لا يعلم عنه المصريون اي شىء...من مسرحية كوميدية خايبة اضحكت الناس عليهم
يتبقي لي بض الاسئله التي اوجهها لهم
ما هي الاجندة التي تصفونها بالغربية ومن اين حصلتو عليها؟
كيف تكون المحاكمة شعبية وانتم لا يعرف نكم المصريون اي شىء-وله في خلقه شئون-
الا تخجلون من انفسكم بد ان اضحكتم الجميع عليكم؟


واخيرا ما فعلتموه يد سقوطا في سيناريوهات الافلام الكوميدية المصريه وحتي الهندية

نصيحة_انتو لازملكو قعدة م السبكي وطبخة من بتوعه_

لسان عايز قطعه

لبيك يا اقصانا

لبيك يا اقصانا........... لبيك النداء

يا اولي القبلتين...... جامع الانبياء

يا ثالث الحرمين.........انا لك فداء

فمااعظم ان نكون في سبيلك شهداء

لنحفظك ونرعاك من قردة الاعداء

ونسجل تاريخنا في صفحة الشرفاء

لبيك يا اقصلنا.............. لبيك النداء

من بغداد الي الصين جموع المسلمين

ترفع الاعلاء راية ........تعلن الوفاء

ولن تهزم راياتنا .......سنرفع هاماتنا

وقسما بحاميك سنحررك باطهر الدماء

فما اعظم ان نكون... في سبيلك شهداء

لبيك يا اقصانا .................لبيك النداء

لو.. ... يبقي انت اكيد اكيد في مصر

1. لو ماشي في طريقك وقابلت واحد بيصلح بلاعات واشفقت عليه مع احتمال اشمئزازك منه..وبالصدفة اكتشفت انه خريج كليه اثارجامعة القاهرة..يعني مش اقل من 90% ثانوية تخريبية....يبقي انت اكيد اكيد في مصر
2. لو بتشتري حلاوة المولد- كل سنه وانت طيب-عشان تحتفل بمولد اعظم الخلق صلي الله عليه وسلم ولقيت عروس المولد..صيني وراكبه توكتوك ولابسه جينز...يبقي انت اكيد اكيد في مصر 2010
3. لو بتفتح صفحة الوفيات بيقي او الحوادث وبالصدفة برضه لقيت خبر عن متوفي .. ومشكلة تاربسبب طابور عيش...يبقي انت اكيد اكيد في مصر
4. لو ماشي في اي شارع وضربت بعينك شفت عامل نضافة بيشحت من الناس ولبسه ومنظره يخليك تهرب من الشارع..من كتر الوساخة متقلقش...انت اكيد اكيد في مصر
5. لو بقي انت من ركاب المترو وصادفت واحد من اللي لابسين لبني دول وبيتلكك عشان يدفعك غرامة وشايفك ساذج-وبالطبع انت هتقوله بينا نعمل محضر-فيه...يبقي انت اكيد اكيد في مصر
6. لو بقي شفت الكلام ده كله وعدي عليك مرور الكرام وزهقت من كتر مابتشوفه كمان..ومبقتش فارقة سينا من سونيا ...يبقي انت اكيد اكيد ف مصر

اشتم يا واد ولا يهمك

عيب يا ولد..ايه اللي بتقوله ده!؟

جمله كثيرا ما تتردد علي السنه اهالينا عندما يسمعون اولادهم في بعض الاحيان يتلفظون باحد الالفاظ الخارجة او بعض التلميحات او النكات الخارجه واشياء من هذا القبيل (اله ادب يعني)

وهذا من منطلق المحافظة عليهم وحفظهم من تلك الالفاظ

(عشان ميكونوش صايعين لما يكبرو زي بتوع الشوارع)

• وبعد هذا التحذير وهذه الجمله يعتقد الاهالي-الغلاية-انهم استطاعو او تمكنو من حمايه ابنائهم من تلك الالفاظ والشياء الغير مرغوب فيها
• لكن دلوقتي يا حصرة الناس هتربي ولادها ازي ويعملو ايه عشان يخلوهم محترمين
• اذا كانت الشتيم بقت مجاني ومتاحة في جميع الاماكن والاوقات واحيانا دليفري لحد عندك وببلاش
• زي التلفزيون مثلا اما تشوف اي فيلم جديد وروش يبقي قول علي ولادك يا رحمن يا رحيم -اصلا هيتعلمو كل حاجة وهما في اللفه-
• عارف مثلا
• لو واحد بيطلب من ابنه يجيبله النضارة من اوضته عشان يقري الجرنال-مشوار في نفس الشقة والنعمه- يلاقي احمد مكي طالعلوه بسلطاته وباب غنوجه وبيقوله a7a
• اما لو نسي مثلا وطلب من واحد من ولاده طلبين ورا بعض واخوه قاعد معزز مكرم...فثواني هيلاقي احمد حلمي جاهز بالرد
• ليه هو trs كده رضا
• ده غير المخرج العالمي خالد يوسف وللمبي اول ممثل اتكلم عن المحشي وطريقة الغرف في السينما المصريه

سيبك من الافلام-دي اصلا معظمها هابطة-

• خلينا في الكورة
• عارف لو واحد بيتفرج علي ماتش كورة وولاده ومراته قاعدين جنبه عشان يشوفو الماتش
• هيبقي الراجل حاطط ايده علي قلبه وبيدعي للحكم انه ميغلطش اكتر ما دعي لمصر قدام الجزاير.عشان الجمهور ميمارسش هوايته المفضل فب اغانيه والحانه المحفوظة زي..............عيب
• ...طيب بلاش الكورة دول اصلا جمهور درجة تالته وبيبقو متعصبين

خلينا في الاخبار ونتكلم شوية جد عن الدنيا والسياسه ومجلس الشعب والحاجات الب... دي

• بس يا عيني دلوقتي بيق هتقول يا ريتني ما قلبت القناه والكلام عن الحاجات دي لمل تلاقي
• الكابتن شوشو بيحلف يمين طلاق علي المدام وانها تتحرم عليه لو مخدش حقه من الراجل اللي شتمه لأ وكمانهو رد عليه...يا وسخ انا اشرف منك وحيا امك ما هسيبك
• هو في بعد كده

• خلاص خلاص
• اقولك علي فكرة نقفل التلفزيون وننزل الشارع والمدرسه ولكليه ونقف في اشارة المرور ونشوف اتنين بيتخانقو عشان واحد منهم زنق علي التاني وشوف الاولاني وهو دابب صباعه من الشباك وفرحان بيه والتاني وهو بيقولو -تلاقي امك اللي جايبهالك-
• ولا هزارنا يا شباب من الابتدلئي لحد الجامع ولا ولا ولا
• عايزين بعد ده كله الواد ميتلمش الشتيمه ويبقي دكتوراه

وكمان ابوه بيقولوه عيب

يا حاج كبر احنا اصلا تيت

• المفروض تبقي فاهم وتقول لابنك
• اشتم يا واج كمان وكمان...يمكن تفرح قلبي وتطلع زي شوشو

لو.. ...... ..... يبقي عيب عليك

1. لو حد بيكلمك عن ازمه الانابيب اللي في بلدك وانت مش عارف...يبقي عيب عليك
2. لو حد بيكلمك عن مصانع كتان طنطا اللي اتباعت باقل من 100 مليون جنيه وتمن اراضيها يعدي 10 مليار جنيه وانت مش عارف يبقي عيب عليك
3. لو حد بيكلمك عن استقبال الجماهير للدكتور محمد البرادعي فور وصوله من النمسا اذا كنت موافق علي ده او مش موافق وانت مش عارف يبقي عيب عليك
4. لو حد بيقولك ان الدراسات اثبتت ان المصريين منهم 12% مصابين بفيروسc وانت مش عارف يبقي عيب عليك
5. لو حد بيقولك انك لازم تقري وتعرف عن اي حاجة كل حاجة وانت مش فاهم ليه بيقول كده يبقي عيب عليك
6. لو حد كلمك عن القيادي في حركة حماس (محمود المبحوح) الذي اغتيل في دبي من ايام وانت مش عارف اللي حصل يبقي عيب عليك
7. لو حد قالك ان الاسرائليين عايزين يضمو الحرم الابراهيمي للمواقع الاثريه اليهوديه وانت مش عارف يبقي عيب عليك
8. لو حد قالك الكلام اللي فات ده كله او اي حاجة منهوانت لما علافت اتخنقت منه واستغربت وقلت انا مالي يبقي عيب عليك

المواطن مات

كان حلمه يلقي وظيفة

كان نفسه ف لقمه نضيفة

ملقاش من ده ف وطنه

راح يدور ف البلاد الغريبه

باع كل اللي حواليه

راح لسراب كان باين ف عنيه

راح علي ضهر قارب

وراحت روحه...غمضت عنيه

مات

مريض وحاله صعب

لانه من عامه الشعب

ميملكش حق العلاج

علاجه علي طريقة الدولة

علاجه في المستشفيات العامه

ياريته......ما فكر يتعالج

شفاه كان في نقل دم

وفعلا..نقلولو الدم

ولان الدم..كان ملوث

نفسه اتحبس

مات

عايش متغرب عن اهله

يا دوب عامل علي قد حاله

ميقدرش يركب طياره

اخره يركب عياره

محتاج بعد غيبة

محتاج..يلقي اهله

وابتدت عبارته الطريق

وانتهت رحلته غريق

وكتير غيره ميتعدوش

في البحر في البر

كانو غدوة للقروش

مات

بيصحي م الفجريه

يجري علي اكل عيشه

عايز..يوفر حق الزاد

لعيلة...بنات وولاد

عيله....مسئوله منه

نفسه يوفرلها...لقمه هنية

وبدل ما يركب ميكروباص

بجنيه واحد بس

ركب قطر العياط

ليوفر حبة جنيهات

ووقت ما وفر المصاريف

وقت حياته كان فات

مات

بيشرب مية مجاري

بياكل سم هاري

هواه كله عوادم

عمره معداش الاربيعين

صحته ولا سن التسعين

الراحة...فحياته محارم

يا ريته كان مات

مصطفي التلواني

الازمه فين؟؟

في مقابلتك الشخصيه الاولي-مثل التقدم لوظيفه وهي الاولي لك في حياتك العمليه-مجال العملغالبا ما يكون هناك بعض التوتر الذي يملأك ويلازم كلامك(ومع اول سؤال يطرق ابوابك..تأثيره يكون صعب عليك كرصاصه اخترقت قلبك(حتي لو كان بيسال عن اسمكاما لو كانت الاولي لك لكن من نوع اخر -اصعب شويهوهي مقابلتك مع والد الفتاه التي كم تمنيت ان تتزوجها..ذالك الشخص المبجل الذي ينتهز الفرصة وينهال عليك بالاسئلة والطلبات مع مقارنة -سخيفة- صغيرة مع شخص اخر كان في نفس موضعك ورشف من نفس كأسك لكنه ما لبث ان هرب سريعا ولم يكمل المقابلةفي السرد السابق من الجديث عن بعض انواع المقابلات التي قد تمر بها في حياتك او بعض المواقف التي تتطلب اظهار شخصيتك وقدراتك..تشعر ببعض الرهبة والتوتر (حتي لو كانت النتيجة انك مطابق للمواصفاتذلك لانها طبيعة بشرية لكن اذا كان الشعور الظاهر لك انك غير مناسب _ وتافه ومقلتش ولا جمله مفيدة من اول القعده_سيس يعني فماذا سيكون شعورك؟؟؟وما هي الاسباب؟_لانك شاب بطبيعتك تافه ولا تميل الي الجد_السبب منك يعنيولا تعرف سوي اخر كليب لتامر حسني وقصة اليساام المجتمع؟الذي يشير دوما الي اهمية دور الشباب في اعمار وتقدم الامة..ومع ذلك فهو لا يتواني لحظة عن دهس اي موهبة جديدة او محاولة يائسة للتغيير.. ( ام مجتمعك الصغير(العيلة يعني ابوك الذي يعمل 25.5 ساعة يوميا لكي يكفي احتياجاتك انت واسرتك. ولا يراك الا في العطلات الرسمية للدولة.ولايعرف سوي انك في المرحلة التخريبية كذا وتأخذ منه فلوس كذا.بالاضافة انه متأكد انها -مصاريف علي الفاضي-لكنها شهادة والسلام وامك اذا كانت عامله فهي ايضا زائرة لأسرتكم العزيزة في بعض الاوقات لكي تحضر الغداء او لأشياء من هذا القبيل ثم تعدو سريعا الي سريرها العزيز لكي ترتاح قليلا الي يومها التالي (ومعا كل ذلك يعتقدون انهم يعلمون كل صغيرة وكبيرة في الاسرة!!وهما في العسل .اخر من يعلم) ام ام ام التلفزيون ؟ تلك المربية التي ربتك وقامت علي رعايتك في صغرك والي الان تقوم بتلك العملية ليس لك وحدك انما لك ولاسرتك ولمعظم ابناء جيلك الكرام تلك المربية التي تقوم بمسح كل ما يحمله مخك من معلومات واعادة ملأه بما تريد هي فتصور معي انك من مدمني البرامج الرياضية . فانه سيقوم بمسح كل ما تعلمه نفسك عن الرياضة والروح الرياضية وسيقوم شخص مؤهل لذلك تماما وسيقدم كل ما يمتلك من احاديث نسائية (علي المصططبة من ردح وسب وتلقيح كلام) بالاضافة الي نداءاتصوت الحق الزائفة تلك البعيدة كل البعد-عن حنجرة اخينا مقدم البرنامج- اما اذا كنت من مغرمي الافلام-الامريكية خاصة-الان اطمئن انك قد القيت نفسك في غابة من العنف والجنس وستنسي اخر ما تحمله من صفات تعبر عن هويتك العربية وفي خلال سنة او اقل ستكون كالورقة التي يتناقلها الهواء الي اي مكان يريده هو وليس انت لكن اذا كان ل(النت ) دور كبير في حياتك من -mail facebook chating- واكيد مواقع ال..... عيب فهنيأ لك ستصبح في عزلة تامة عن العالم-الحقيقي مش اللي احنا عايشين فيه ده- بعد كل الاسباب السابقة والافتراضات تلك..لا احتاج لقدر كبير من الزكاء لأعرف اجابتك واحساسك تجاهي وتجاهكلامي الممل . انت من مدمني كل ذلك بل اكثر.وكل الاسباب السابقة متواجدة في حياتك من مجتمع او أسرة او شاشات صغيرة شيطانية...لكن اين الخطأ ؟ ومن المسؤ ل عن كل ما فينا من تفاهة وسطحية وتفكير ساذج احيانا معدوم دائما ؟... ا(اقولك علي حاجة قبل ماتنطقها بلسانك انت ) خليك في حالك وانا في حالي ولما اصلح من نفسي الاول ابقي اشوفك بحاجة...لسان عايز قطعه..مصطفي التلواني